哪！你話鍾唔鐘意咯！

　　如果近來不是忙得毒氣攻心，老早已要寫寫關於平洲了。你知，有時苦口苦面得自己睇見都唔開胃。去平洲那兩天，很久沒有玩得那麽開心過了。
　　那天起初是很倒霉的。我們這些平日不慣遲到的雷達表人馬，竟連打尖兼搶閘也趕不到火車。你地知唔知火車臨開前噹噹大響嘅鐘聲係要來做乜聲嘅呢？原來是要激死在天星小輪上等船泊岸的人。跑了上岸，嘿，架火車一陣間就睇唔見。香港樣樣都有D唔妥嘅，點知火車會準時開出咁唔正常。個個衰鬼平洲，又一日得一次船去咁矜貴，趕不到只好暫時返回老家。但神氣十足地背了一大袋東西出來，轉頭便回去，一定俾屋企人笑壤，只好跳上亡命飛車。點知我地三個人都唔識路，個司機亦唔知元洲仔碼頭在什麼地方，求其見了個碼頭便趕左我地落車，原來不是這個，只得施展絕頂輕功，不過，唔係話牙擦，總之在最後一秒趕到，另一隻腳還未踏上去，船便開了。見了那班朋友，有如他鄉遇故知，還未舒過氣，便索性一不做二不休，厚起臉皮不認遲到。
　　隻船好不長氣，駛了差不多三小時。和同船的傾吓，啊，原來而家D鄉下人冇話重係「相見無雜言，但道桑麻長」咁古老嘅嘞。佢哋第一句就問人：「馬票幾時至開彩丫？」
　　天長地久有時盡，終於到了。吃得晚飯來已夜，講了一陣鬼古。我們的領隊名叫Funny，他肚裡藏着一副錄音機，多每五鐘便播一隻鬼古出來。佢D鬼古，不但連我都唔怕，係人聽聽吓都會笑咁得意嘅。晚上借人家學校的課室來睡。把書桌拼起來。我用四塊半便突出一雙腳，也可勉強夠，亞密便要足足五塊了。我雖然不怕黑，但一時瞓唔着，稔下稔下，雖然把吊頸鬼叫做人心果樹上熟是很詩意，到底唔係好可愛。又想起從前我家中有一個墨盒，晚上八時後便打不開蓋子的……越稔越唔妥。亞密又不肯讓我留下一隻蠟燭亮著。後來不知怎的陰差陽錯才睡著了。
　　第二天沿海邊饒了一個圈子。風景很美，一群人都好玩，所以很開心。平洲最特出是那些千層巖石，你一眼望過去便自然會睹物思皮想起很多人——譬如說，你們——的面皮。有些男孩子爬了上峭壁作狀拍照，好似被釘了上去晒乾精似的，成世都唔捨得下來，咪以為佢地好叻呀，其實上得唔落得，在稔計仔。
　　行行重行行，斬吓眼便到了斬頸州。嘩，真有抽刀斷頸頸更長，斬不斷理還亂之勢。咦，地上好似重有血跡斑斑，信不信由你。如果我沒有記錯，吃過午膳後我們便踱到去「龍落水」了。我只記得有人「泊！」的一聲開了水戒，滑了下水。唔係黑心，但係好難忍得住唔笑。上了龍背，實在乾得山窮水盡，只有到洲背有人家處借水買蔗，然後纔下去「難過水」，這卻全程最易過最寫意一段。然後到了我最喜歡的更樓石。
　　坐了一會便老遠跑出去碼頭接船，該有三個朋友這天才來的，還預備煲番薯糖水歡迎他們，但一個也接不到！
　　晚上拉了幾捆柴去更樓石旁起了個火，什麼他沒有得吃，一群人便傻兮兮地圍着火堆烘人肉乾。對面是大陸，近得差不多像尖沙咀的海面。大話點便可以說看見紅衛兵。我們中有些不知好歹的拿起電筒便打着三長兩短的訊號，如引了紅衛兵過來，唱〈東方紅〉也來不及。
　　這晚夜睡，一瞌上眼便得起來趕船，船未開已暈其大浪，回到家還得在半昏迷狀態下趕功課，若告訴人便只有被人罵自作自受，不過，都係好嘅！